ຄືນນີ້ ໃນຫ້ອງນອນຂອງຂ້ອຍ ມີຍິງໜຶ່ງອຸລາເຫງົາ
ນາງເປີດເພງເບົາໆ ນັ່ງຊຶງຊົມຟ້າ
ສອງດວງຕາໄຫຼຍ້ອຍ ເຕືອນຕົວໃຫ້ຮູ້ວ່າ
ລືມເຖີດໜາໜຶ່ງຄັ້ງ ທີ່ເຄີຍບ້າຮັກເຂົາ
ນີ້ບໍ່ແມ່ນຂ້ອຍກ່າວເວົ້າ ປະນາມດ່າກັບຊາຍໃດ
ຂ້ອຍພຽງຂຽນພາສາໃຈ ທີ່ຄໍ່າຄວນໃນຕອນນີ້
ຂຽນເລື່ອງລາວນາລີນ້ອຍ ຍິງສາວທີ່ລຽບງ່າຍ
ກັບຊີວິດສາກໂຫດຮ້າຍ ທີ່ພວມພົ້ນຜ່ານໄປ
ສອງວັນຫຼັງຂ້ອຍໄດ້ ບັດເຊີນສົ່ງມາເຖິງ
ຂ້ອຍລື້ນເລິງໃນອຸລາ ເມື່ອຮັບເອົາບັດເຊີນແລ້ວ
ພໍອ່ານຫຼາຍແຖວພົ້ນ ຕົວເຮົາຈຶ່ງຮູ້ວ່າ
ວັນວິວາມື້ອື່ນເຊົ້າ ຄືແຟນຂ້ອຍຊິແຕ່ງດອງ
ຂ້ອຍໄດ້ພຽງມອງເຈ້ຍ ເກືອບລົ້ມຖ່າວທັງຢືນ
ຂົມຂື່ນເຈັບເດດວງໃຈ ອ່ານເນື້ອໃນບັດເຊີນແລ້ວ
ຊື່ຂອງຊາຍໃນແຖວໜ້າ ຕຳຕາອຸລາແລ່ງ
ຂ້ອຍໝົດແຮງລ່ອຍລ້າ ສີໜ້າຫຼ່າເຫຼືອງ
ເມື່ອຂ້ອຍຮັບຮູ້ເລື້ອງ ເຈົ້າບ່າວຄືແຟນເຮົາ
ພວມຈະກາຍເປັນຜົວເຂົາ ແລ້ວລະໜາໄວໆນີ້
ຂ້ອຍຍັງມີພຽງສຽງໄຫ້ ອຸກໃຈເດຈະບ້າປ່ວງ
ຖືກເຂົາລວງຫຼອກຕົ້ມ ຊົມແລ້ວບ່າຍໆໜີ
ນີ້ຫຼືຄົນດີຂ້ອຍ ທີ່ຫວັງແຕ່ງຢ່າງຈິງໃຈ
ປະໄວ້ໃສຄຳສັນຍາ ວ່າຮັກດຽວພຽງຂ້ອຍ
ສຸດທ້າຍກາຍເປັນດ້ອຍ ຕົວສຳຮອງຢຽບຜ່ານ
ລາຄຳດຽວກໍ່ບໍ່ຕ້ານ ໃຫ້ຕົວຂ້ອຍໄດ້ເຜື່ອໃຈ
ຂ້ອຍມັນອົດບໍ່ໄດ້ ຈະກັ້ນຫຼັ່ງນ້ຳຕາລິນ
ສິ້ນແລ້ວນໍຄວາມຫຼັງ ທີ່ງົດງາມໃນຄາວກີ້
ມີຈະມີຕົວເຈົ້າ ຮຽງພາຂວັນປ້ອນໄຂ່
ວ່າຈະໄດ້ກອດເຈົ້າ ຍາມເຂົ້າສູ່ບ່ອນນອນ
ຄວາມສຸກເຄີຍເສບຊ້ອນ ຄັ້ງເກົ່າການຍມາ
ພໍເມື່ອຫຼັບຕາລົງ ກໍ່ເລົ່າເຫັນມັນໄດ້
ເປັນຄວາມສຸກຈາກໃຈຂ້ອຍ ບໍ່ເຄີຍລວງລໍ້ລ່າຍ
ແຕ່ວ່າຊາຍນັ້ນເຊື່ອງຊ້ອນ ຄວາມລວງຕົ້ມຢ່າງແນ່ໃຈ
ເສຍໃຈເດທີ່ໄດ້ ພົບຊາຍທີ່ບໍ່ໃຈຈິງ
ຊາຍທີ່ເຫັນຕົວຍິງ ຄ່າບໍ່ມີເທົ່າໃບເຈ້ຍ
ເສຍທັງໃຈເສຍທັງໜ້າ ເສຍເວລາເສຍທຸກສິ່ງ
ກາຍເປັນຍິງຖືກກ່ອມກິ້ງ ເພື່ອຊາຍຊ້ອນຮ່ວມເສບເຊີຍ
ເຖິງຂ້ອຍຊິເອີ່ຍເວົ້າ ປະນາມກ່າວເປັນກອນ
ກໍ່ເປັນພຽງຕົວອັກສອນ ເພື່ອກ່າຍລົງໃນໃບເຈ້ຍ
ຄວາມຫຼັງຍັງເປັນເມຍຖິ້ມ ຂອງຊາຍບໍ່ໄດ້ແຕ່ງ
ພາບຈຳແລງເຫຼົ່ານັ້ນ ປະນາມຂ້າກວ່າສິ່ງຂຽນ
ມັນໄດ້ກາຍເປັນສ້ຽນ ສຽບຢູ່ກາງໃຈ
ມັນກາຍເປັນແປວໄຟ ໄໝ້ລາມອຸລາມ້ອຍ
ເປັນສັດຕູທຳລາຍຂ້ອຍ ບໍ່ມີວັນຈະເວັ້ນຫວ່າງ
ເປັນຂວາກໜາມຂີດເນື້ອ ໃຫ້ໃຈຂ້ອຍແສບລະທົມ
ວັນນີ້ ຕັດສິນໃຈກົ້ມໜ້າ ໄປຮ່ວມງານດອງ
ຂ້ອຍຢາກມອງດູຊາຍ ເມື່ອຕອນວິວາເລີ້ມ
ຍາມແຕ່ງເຕີມເສີມໜ້າ ທາຕາຄົງຊິຫຼໍ່
ຂ້ອຍມາລໍພົບພໍ້ ໃບໜ້າທີ່ແຕ່ງແປງ
ບໍ່ແມ່ນມາເພື່ອກັ່ນແກ້ງ ປັ່ນປ່ວນງານດອງ
ຂ້ອຍຍິນດີມາສະຫຼອງ ເພື່ອບອກຄຳຍິນດີດ້ວຍ
ມາອ່ວຍພອນເສີມສ້າງ ພອນໄຊຕາງລາສັ່ງ
ລາຄວາມຫຼັງທີ່ເຈົ້າ ເປັນແຟນຂ້ອຍໄດ້ຊື່ນໃຈ
ຂ້ອຍມາຍ້ອນເຈົ້າໃຫ້ ຝາກສົ່ງບັດເຊີນ
ຊິຫ່າງເຫີນກັນໄປ ຍັງຫ່ວງໄຍຕົວຂ້ອຍ
ຢ້ານເຈົ້າຫາວ່າໃຈນ້ອຍ ເສຍສັດທາລ້າເປົ່າ
ມາຂອບໃຈທີ່ເຈົ້າ ຍັງເຫັນຂ້ອຍເພື່ອເພື່ອນດີ
ຍ້ອນຂ້ອຍຄິດເຊັ່ນນີ້ ຂ້ອຍຈິ່ງຕັດສິນໃຈ
ຍິນດີໄປອ່ວຍພອນ ອະດີດແຟນຂອງຂ້ອຍ
ດ້ວຍຄວາມຫວັງພຽງນິດນ້ອຍ ຈະເຫັນຊາຍມີຍິ້ມສັ່ງ
ຍິ້ມສິ້ນຫວັງສຳລັບຂ້ອຍ ໃນມື້ຕໍ່ໄປ
ເຊົ້ານີ້ ພໍເມື່ອຕົວຂ້ອຍໄດ້ ກ້າວສູ່ງານວິວາ
ສາຍຕາຄົນທັງຫຼາຍ ກໍ່ເລົ່າມອງດູຂ້ອຍ
ພວກເຂົາຄອຍແນມຈ້ອງ ມອງເຮົາເໝືອນບອກວ່າ
ກັບເຖີກໜາຂ້ອຍຢ້ານເຈົ້າ ຊິເພມ້າງເຄື່ອງແຕ່ງດອງ
ຕາທັງຫຼາຍກ່າວຟ້ອງ ມອງເຮົາຕໍ່າເກີນຈິງ
ເຂົາເຫັນເຮົາເປັນພຽງຍິງ ທີ່ເສດເຫຼືອໃນງານນີ້
ຂ້ອຍຕັ້ງໃຈມາດີແລ້ວ ຈະມາງານຢ່າງລຽບງ່າຍ
ບໍ່ແມ່ນມາເພື່ອຄິດຮ້າຍ ທຳລາຍລ້າງຊື່ສຽງ
ໝໍພອນເທດດັງປ້ຽງໆ ເໝືອນຟ້າຜ່າເຂົ້າຊວງໃນ
ຫົວໃຈເຮົາມັນເຈັບ ໜ່ວຍມະໂນແດດີ້ນ
ຟັງຍິນສຽງໂຮຮ້ອງ ເອົາຂວັນສາວບ່າວ
ຍໍເຫຼົ້າຂາວໄກ່ຕົ້ມ ຂະໜົມກ້ວຍອ່ວຍພອນ
ຫົວອົກເຮົາວາບວູ່ຮ້ອນ ເຫັນເຂົານັ່ງໃນພາຂວັນ
ຄຽງຄູ່ກັນຊອນລອນ ເອີບອີ່ມເຕັມດ້ວຍຮອຍຍິ້ມ
ສອງຮິມສົບບານແຍ້ມ ສຸກໃຈໄດ້ຄອງຄູ່
ສ່ວນຕົວເຮົານັ້ນບໍ່ຮູ້ ນ້ຳຕາຍ້ອຍແຕ່ເມື່ອໃດ
ບໍ່ແມ່ນຂ້ອຍຮ້ອງຮໍ່າໄຫ້ ຍ້ອນວ່າເສຍໃຈ
ແຕ່ປຶ້ມໃນຄວາມຮັກ ທີ່ພວກເຂົາມີນັ້ນ
ເຖິງຍິ້ມໃນວັນນີ້ ແກມນ້ຳຕາຍັງມີຄ່າ
ດີກວ່າຮ້ອງຮໍ່າໄຫ້ ບໍ່ມີຍິ້ມໃຫ້ໝູ່ເຫັນ
ກ່າວອຳລາຄົນຮັກ ຈາກໃຈຂອງຂ້ອຍ
ສາຍຕາຄອຍແນມນິ້ງ ຊົມເຂົາປ້ອນໄຂ່
ສຸກໃຈເຖີດທີ່ຮັກຂ້ອຍ ທີ່ເຄີຍກິ້ງກ່ອມນອນ
ຊາຕາຂ້ອຍບໍ່ຄາດຊ້ອນ ວິວາຮ່ວມຮຽງຊາຍ
ຢາກຮູ້ສຶກເດຄວາມໝາຍ ເມື່ອແຕ່ງດອງກັບຊາຍແລ້ວ
ມືກອດແອວເຮົາເຂົ້າ ຕຽງນອນຊ້ອນເສື່ອ
ຫຼັງຈາກພົງເຜົ່າເຊື້ອ ຜູກແຂນໃຫ້ແຕ່ງດອງ
ຂ້ອຍຄ່ອຍໆຢ່ອງຍ້າຍ ມາສູ່ພາຂວັນ
ນຳຕາມັນຕົກລົງໃນ ບໍ່ອາດທຳໃຈໄດ້
ມືເດ່ໄປຈັບເອົາຝ້າຍ ກາຍາຮູ້ສຶກສັ່ນ
ເໝືອນຖືກຟັນຜ່າມ້າງ ໃຈຂ້ອຍຊິກະເດັນ
ເກືອບຈະເປັນວິນລົ້ມ ມໍລະແມ່ງສະຕິເສຍ
ຂ້ອຍອ່ອນເພຍກາຍໃຈ ເຄື່ອນເໜັງບໍ່ທຳໄດ້
ຂ້ອຍຈິ່ງອອຍໃຈນິ້ງ ໂຢະລົງໂຢບນັ່ງ
ເຕື່ອນສະຕິອິກຄັ້ງ ຕົວຂ້ອຍຢ່າອ່ອນແອ
ເຖິງຕົວເຮົາຊິຜ່າຍແພ້ ແນ້ວແນ່ຄວາມເປັນຈິງ
ເຖິງສັງຄົມຈະແລຫຼິງ ວ່າຊົ່ວຊາມເລວຊ້າ
ເຖິງສາຍຕາຈະແນມຈ້ອງ ມອງເຮົາເປັນຍິງຊົ່ວ
ສະເພາະຕົວຂ້ອຍແລ້ວ ຍັງພ້ອມເຮັດສິ່ງດີ
ທີ່ຂ້ອຍເປັນເຊັ່ນນີ້ ຍ້ອນຂ້ອຍອ່ອນດຽງສາ
ບໍ່ຮູ້ທັນຄາລົມ ລ່ຽມຊາຍລວງລໍ້
ຄິດວ່າຕົນມາພໍ້ ຊາຍຄົນດີໝັ້ນທ່ຽງ
ຍ້ອນຫຼົງໄຫຼປາກກ້ຽງ ລົມເວົ້າທີ່ຄ່ອງຫູ
ນີ້ແລະຄືຄູ່ແທ້ ທີ່ຝັນໄຝ່ມານານ
ຄວາມຮັກສຸດແສນຫວານ ຮັກຈິງໃຈພໍ້
ຈຶ່ງຍົກຍໍຖວາຍໃຫ້ ທັງກາຍໃຈບໍ່ຮູ້ຮິ່ນ
ພໍເຂົາກິນອີ່ມແລ້ວ ກໍ່ໄລຖິ້ມຄ່າບໍ່ມີ
ແລ້ວຄວາມດີຂອງຂ້ອຍ ກໍ່ສິ້ນຄ່າຄວາມໝາຍ
ພຽງຄັ້ງດຽວຊາຍທຳລາຍ ເສບເຊີຍຊົມຊ້ອນ
ຖືກຕົວຊາຍສອນໃຫ້ ຊາມໄວຢ່າໃຈງ່າຍ
ຢ່າໝາຍຕາມໍ່ໃກ້ ພໍໃຈແລ້ວຮ່ວມເສບສົມ
ຂ້ອຍຕັ້ງໃຈບໍ່ໃຫ້ລົ້ມ ໂຮຍຮ່ວງກາງພາຂວັນ
ຂ້ອຍໝັ້ນໃຈຕົນເອງ ຕ້ອງສູ້ກັບຄວາມຈິງໄດ້
ຈະບໍ່ນອງນ້ຳຕາໄຫ້ ດວງໃຈຕ້ອງຜຸດຜ່ອງ
ຂ້ອຍຫຼຽວມອງເສັ້ນຝ້າຍ ບາຍຢື້ເຂົ້າໃສ່ມື
ຄວາມກະຕືລືລົ້ນ ທີ່ຄົນອື່ນເຂົາມີ
ຄວາມປິຕິຍິນດີ ທີ່ທຸກຄົນມີນັ້ນ
ເຫດສັນໃດໃຈຂອງຂ້ອຍ ມີພຽງຄວາມຫວ່າງເປົ່າ
ຕັ້ງໃຈຍິ້ມໃຫ້ເຈົ້າ ຍາມເຮົາໄດ້ຜູກແຂນ
ອະດີດແຟນຂອງເຈົ້າ ມາອ່ວຍພອນໄຊ
ເນື່ອງໃນວັນສົມຣົດ ຮ່ວມຮຽງສອງເຈົ້າ
ຕົວເຮົາພຽງມາໃຫ້ ອ່ວຍພອນໄຊປະເສີດຄ່າ
ຂໍເມຍເຈົ້າຢ່າດ່າຂ້ອຍ ເກີນເລື້ອງທີ່ວ່າແຟນ
ຂໍພຽງນາງຢ່າໂກດແຄ້ນ ໝາງໝົ່ນໃນໃຈ
ເຈົ້າໄດ້ເປັນເມຍເຂົາ ສ່ວນເຮົາພຽງແຟນຊ້ອນ
ແຟນທີ່ເຂົານອນຫຼິ້ນ ເຊີຍຊົມເປັນທາງຜ່ານ
ຂ້ອຍຢາກຂານກ່າວເວົ້າ ແຕ່ເຮົາກ້າບໍ່ເຖິງ
ຂ້ອຍໄດ້ພຽງເບິ່ງໜ້າ ແລ້ວຍິ້ມຕໍ່ໄມຕຣີ
ເປັນຄົນດີຂອງເຂົານະ ນັບແຕ່ໃນວັນນີ້
ຂ້ອຍຍິນດີມາໃຫ້ ອ່ວຍພອນໄຊບອກກ່າວ
ວ່າເຈົ້າສາວດັ່ງເຈົ້າ ສົມຄວນແລ້ວໄດ້ຄູ່ເຂົາ
ຂໍອ່ວຍພອນໃຫ້ເຈົ້າ ພົບແຕ່ຄວາມສຸກຂີ
ເປັນເມຍທີ່ດີຂອງເຂົາ ຢ່າປ່ອຍລາໄລຮ້າງ
ໃຫ້ຮ່ວມກັນສຸກສັນສ້າງ ເປັນຄອບຄົວທີ່ອົບອຸ່ນ
ບຸນພວກເຈົ້າສ້າງໄວ້ ຈຶ່ງມາໄດ້ຄູ່ກັນ
ຂໍໃຫ້ຮັກກັນໝັ້ນ ຄົງຮັກສະເໝີໄປ
ຄອງຮັກສຸກສົມໃຈ ຮົ່ມເຢັນນຳກັນຖ້ອນ
ຂໍອ່ວຍພອນໃຫ້ສອງເຈົ້າ ມີລູກຊາຍໃຫ້ຮູບຫຼໍ່
ແຕ່ຢ່າເໝືອນພໍ່ເຈົ້າ ທີ່ໃຈຄ້າຄ່າຜູ້ຍິງ
ມີລູກຍິງຂໍໃຫ້ໄດ້ ງາມດັ່ງມານດາ
ແຕ່ຢ່າທຳໂລເລ ງ່າຍໃຈຄືຂ້ອຍ
ໃຫ້ຄ່ອຍເອົາສະຕິຕັ້ງ ຫຼິງຊາຍໃຫ້ແນ້ວແນ່
ໃຫ້ພົບຊາຍທີ່ຮັກແທ້ ຢ່າລວງຫຼິ້ນດັ່ງພໍ່ນາງ
ມືປ່ອຍວາງປະຝ້າຍ ແລ້ວຍິ້ມສົ່ງຢ່າງຈິງໃຈ
ຍອມຮັບໃນຄວາມເປັນຈິງ ອະດີດແຟນຂໍລາເຈົ້າ
ເຮົາຈະໄປສະສົມສ້າງ ປາລະມີອີກຄັ້ງໃໝ່
ຂ້ອຍອະໄພໃຫ້ເຈົ້າ ໃນເລື້ອງທີ່ຜ່ານມາ
ຂໍພຽງເຈົ້າຢ່າເວົ້າ ປະນາມກ່າວເກີນຈິງ
ຄິດໃສ່ໃຈວ່າເປັນຍິງ ຄັ້ງໜຶ່ງເຄີຍຊົມຊ້ອນ
ຄິດວ່າເຄີຍນອນຫຼິ້ນ ເຊີຍຊົມໃນຄັ້ງຜ່ານ
ຢ່າປະຈານດ່າຂ້ອຍ ເປັນຍິງເປື້ອນທີ່ເສື່ອມເສຍ
ຂ້ອຍເຄີຍເປັນເມຍເຈົ້າ ບໍ່ໄດ້ຜ່ານງານດອງ
ຂໍຮ້ອງຊາຍຈົ່ງເຫັນໃຈ ບໍ່ກ່າວຫຍາມກໍ່ພໍແລ້ວ
ຢ່າກ່າວແຊວຂາຍໜ້າ ນິນທາກັບພວກໝູ່
ຫວັງວ່າຊູ້ເກົ່າຂ້ອຍ ຄົງທຳໄດ້ສິ່ງທີ່ຂໍ
ຄືນນີ້ ຂ້ອຍຈຶ່ງກົ້ມຕໍ່ເຈ້ຍ ຂີດກ່າຍພຽນຂຽນ
ຫວັງເພື່ອພຽງເປັນບົດຮຽນ ເພື່ອເພື່ອນຍິງໃນພາຍໜ້າ
ຫວັງເພື່ອຍິງທີ່ມາພໍ້ ຈັບມັນຂຶ້ນມາອ່ານ
ພົ້ນຊາຕານໃຈມໍ່ໃກ້ ເໝືອນຂ້ອຍໄດ້ພົບມາ
ຜິດແລ້ວຈົ່ງຕັ້ງໜ້າ ສ້າງໃໝ່ຄວາມດີ
ລ້າງລາຄີມົນທິນ ອອກຈາກໃຈໃຫ້ມັນໄດ້
ຢຸດເສຍໃຈໃນວັນນີ້ ຊີວີເຮົາຍັງມີຄ່າ
ຢຸດນ້ຳຕາທີ່ຢາດຍ້ອຍ ໃຫ້ຄວາມເສົ້າຜ່ານໄປ
ເມື່ອນັ້ນເຮົາຊິໄດ້ ຈິດໃຈຄ່ອຍສະຫງົບລົງ
ຢ່າປະສົງໂກທາ ໂກດເຄືອງຊິເລວຮ້າຍ
ບ່າຍໆຄວາມຫຼັງແລ້ວ ໝາຍປອງຊີວິດໃໝ່
ເມື່ອຈິດໃຈໄດ້ປອດກ້ຽງ ຈະໝົດສ້ຽງສິ່ງທຸກໃຈ
ທຸກຄໍ່າຄືນຈົ່ງໄຫວ້ ພຽນພໍ່າພາວະນາ
ປະຕິບັດສິນທຳ ໃສ່ໃຈເອົາໄວ້
ແລ້ວຕົວເຮົາຈະໄດ້ ປະສົບພຽງແສງສະຫວ່າງ
ເຫັນເສັ້ນທາງທີ່ຖືກຕ້ອງ ໝາຍປອງສ້າງແຕ່ສິ່ງດີ ນັ້ນແລ້ວ.
ຂຽນເມື່ອ ປີ 1998
ຂຽນເມື່ອ ປີ 1998
No comments:
Post a Comment