ຄືນນີ້ ເໝືອນທຸກຄືນຜ່ານພົ້ນ ທີ່ຮູ້ວ່າໃຈເຫງົາ
ໜ່ວຍໝອນໝູນຂອງເຮົາ ໄດ້ຊັບເອົານໍ້າຕາຍ້ອຍ
ນັ້ນຄືຕົວຂອງຂ້ອຍ ເຫງົາໃຈຈຶ່ງໄຫ້ຮໍ່າ
ຄືນຄໍ່າໃດກໍ່ສະອື້ນ ບໍ່ມີເວັ້ນແຕ່ຢ່າງໃດ
ມັນເປັນສຽງບອກໃຫ້ ຮູ້ຄ່າຄວາມຫຼັງ
ໃຫ້ຮູ້ຍັງຊີວິດ ທີ່ຄິດພຽງເຫັນໃກ້ ເປັນສິ່ງສອນເຮົາໃຫ້ ຈົດຈໍາໃຈທີ່ມັກງ່າຍ
ຄິດສະບາຍມໍ່ໃກ້ ຈຶ່ງນອນໄຫ້ຮໍ່າ ຄະນິງ
ຄິດຢາກເປັນເມຍກ່ອມກິ້ງ ຫວັງເພິ່ງປາລະມີ
ເຊື່ອວ່າເຂົາເປັນຄົນດີ ຈຶ່ງໃຫ້ນອນຊົມຊ້ອນ
ຫຼອນໄດ້ກິນຂອງແລ້ວ ພັດຄືແຫຼວໄດ້ກິນໄກ່
ປານເສືອເຖົ້າໄດ້ຕ່ອນຊີ້ນ ກິນແລ້ວກໍ່ຜ່າຍໜີ
ແລ້ວສັກສີຂອງຂ້ອຍ ກໍ່ສິ້ນຄ່າຄວາມໝາຍ
ຍ້ອນຖືກຊາຍທໍາ ລາຍ ຮ່ວມນອນຊົມຊ້ອນ
ຖືກຕົວຊາຍສອນໃຫ້ ຊາມໄວຢ່າໃຈງ່າຍ
ຢ່າໝາຍຕາເສບຊູ້ ໃຫ້ເສຍຊັ້ນຊື່ຍິງ
ຄືນນີ້ຫຼິງຫຼໍ່າ ຟ້າ ສ່າງມືດມິດຫງອຍເຫງົາ
ໃນຫົວໃຈຂອງເຮົາ ຍິ່ງຫວັ່ງເວໃຈຄ້ອຍ
ມີພຽງໝອນຂອງຂ້ອຍ ອອຍໃຈໃຫ້ຮູ້ວ່າ
ຢາດນໍ້າຕາເຈົ້າຈົ່ງຍ້ອຍ ຕົວຂ້ອຍຊິຊັບມັນ
ມີພຽງໝອນເທົ່ານັ້ນ ທີ່ນອນຮ່ວມເສຍໃຈ
ເພາະບໍ່ມີຄືນໃດ ທີ່ໜ່ວຍຕາບໍ່ລິນຍ້ອຍ
ມັນຊ່ວຍເກັບນໍ້າ ຕາຂ້ອຍ ໃນຫຼາຍຄືນທີ່ພົ້ນຜ່ານ
ໃຈລ້າວລານມັນຈຶ່ງຍ້ອຍ ເຫັນໃຈຂ້ອຍແດ່ໝອນ
ຂ້ອຍມີຄວາມເດືອດຮ້ອນ ເອົ້າອັ່ງອຸກໃຈ
ນອນອາໄລວັນຫຼັງ ເມື່ອຍັງມີແຟນໃກ້
ຄັ້ງໜຶ່ງໃນຫົວໃຈຂ້ອຍ ສຸກສົມຫວັງຢ່າງຊ້ອຍຊື່ນ
ເກັບກ່ຽວຄວາມຊໍ່າ ຊຶ້ງ ເອົາໄວ້ຢ່າງປ່ຽມໃຈ
ແຕ່ແລ້ວໃນວັນນີ້ ມັນໄດ້ຫ່າງຈາງຫາຍ
ແຕກສະລາຍລາໜີ ຢ່າງບໍ່ມີຫຍັງແລ້ວ
ນີ້ລະຄືຮອຍແປ້ວ ມານຍາລວງຂອງຊາຍໜຶ່ງ
ຊາຍຊຶ່ງໃຈແຫ່ງຂ້ອຍ ເຄີຍສຸກລົ້ນເມື່ອຮ່ວມຮຽງ
ໄດ້ຍິນສຽງເພງຮ້ອງ ດັງລ່ອງມາຕາມລົມ
ເພງຊື່ນຊົມຄວາມຮັກ ແລ້ວຖືກຫັກໃຈຊໍ້າ
ມັນຍິ່ງທໍາ ໃຫ້ຕົວຂ້ອຍ ເສຍໃຈຢ່າງບ້າຄັ່ງ
ເປັນຫຍັງນໍໂລກໜ່ວຍນີ້ ຈຶ່ງມີລົ້ນສິ່ງຫຼອກລວງ
ບໍ່ແມ່ນຂ້ອຍທັກທ້ວງ ປະນາມດ່າຄວາມດີ
ແຕ່ຂ້ອຍຕິຄວາມເລວ ທີ່ແອບແຝງມານັ້ນ
ເປັນຫຍັງມັນຈຶ່ງມີໄດ້ ຄວາມເລວທີ່ຊາດຊົ່ວ
ຄວາມຂີ້ຕົວະຫຼອກຕົ້ມ ມັນມີໄດ້ຈັ່ງໃດ
ທັງທີ່ໃຈເຮົານັ້ນ ຄິດສ້າງແຕ່ຄວາມດີ
ຢາກຈະມີຄວາມຮັກ ທີ່ງົດງາມຈິງແທ້
ທຸກວັນແລເຫັນຍິ້ມ ຈິງໃຈແລະຜຸດຜ່ອງ
ເຫັນໃນສິ່ງທີ່ຖືກຕ້ອງ ບໍ່ປອງຂ້າເຂັ່ນກັນ
ແຕ່ແລ້ວສິ່ງຂ້ອຍຄິດນັ້ນ ມັນບໍ່ແມ່ນຄວາມຈິງ
ຂ້ອຍບໍ່ເຄີຍຫຼິງເຫັນ ສິ່ງຊົ່ວຊາມເລວຊ້າ
ໃນສາຍຕາຂອງຂ້ອຍ ເຫັນຄວາມງາມທີ່ຜຸດຜ່ອງ
ບໍ່ຮູ້ເຫັນສິ່ງແອບຍ້ອງ ໝາຍປອງລໍ້ຫຼອກຊົມ
ຂ້ອຍໂງ່ງົມປັນຍາປູ້ ບໍ່ຮູ່ຮ່ອມເຫັນຈິງ
ຍ້ອນເປັນຍິງເຫັນຄວາມງາມ ຈຶ່ງຖືກຊາຍລວງຕົ້ມ
ຫຼົງຄາລົມລວງເວົ້າ ຫວານໃນທີ່ຊຶ້ງສ່າ
ຫຼົງວາຈາອິ່ນອ້ອຍ ທີ່ມີໃຫ້ແຕ່ລະວັນ
ຫຼົງຂອງຂວັນທີ່ເຂົາໃຫ້ ເປັນຄ່າສິນໃຈ
ເລີຍຫຼົງໄຫຼວ່າເຂົາດີ ຢ່າງບໍ່ມີລະວັງໄວ້
ຈິ່ງປ່ອຍໃຈໃຫ້ໂລມເນື້ອ ຈົນເຫຼືອຕົວເປືອຍເປົ່າ
ຍ້ອນປ່ອຍເຂົາລູບຄັ້ນ ໃຈເຮົານັ້ນຈິ່ງອ່ອນໄຫວ
ບໍ່ອາດຄຸມສະຕິໄດ້ ໃຫ້ເຂົາແຊ່ກາມະລົມ
ໃຫ້ເຂົາຊົມຄວາມສາວ ແລ້ວກ່າວລາໜີພ້ອມ
ຮັກຫອມຫວນຍັງເຫຼືອໃຫ້ ພຽງເສຍໃຈໂອ້ອ່າວ
ເສຍຄວາມສາວຍັງບໍ່ແລ້ວ ຍັງເສຍໜ້າດ່າຫຍາມ
ຖືກລວນລາມຊົມຊ້ອນ ນັ້ນຍັງບໍ່ປານໃດ
ແຕ່ສິ່ງເຮົາເຈັບໃຈ ແຄ້ນຊວງຈິງໆນັ້ນ
ເຂົາກ່າວຂວັນຈາເວົ້າ ປະນາມເຮົາເປັນຍິງເງື່ອນ
ຍິງກາລີແປດເປື້ອນ ນອນຫຼິ້ນງາຍດາຍ
ເປັນຂອງຂວັນຖວາຍໃຫ້ ຈາກທີ່ຮັກສຸດໃຈ
ນໍ້າ ຕາເຮົາຈິ່ງລິນໄຫຼ ຫຼັ່ງລົງບໍ່ວາຍເວັ້ນ
ຄົນໃດເຫັນກໍ່ແນມໜ້າ ໃນສາຍຕາຍິງຊັ້ນຕໍ່າ
ສັກສີຖືກຢຽບຢໍ່າຖິ້ມ ເໝືອນຄົນໄຮ້ຄ່າໝາຍ
ການເປັນຍິງສູນສິ້ນ ທຸກສິ່ງໃນຊີວີ
ໝົດສັກສີໃນສັງຄົມ ຍ້ອນຖືກຊາຍຊົມຊ້ອນ
ຖືກຊາຍນອນຊົມຫຼິ້ນ ພຽງທີ່ດຽວກໍ່ສິ້ນຄ່າ
ແລ້ວສັງຄົມກໍ່ເຂັ່ນຂ້າ ປະນາມເວົ້າຢ່າງເສື່ອມເສຍ
ກາຍເປັນເມຍເຊີຍຫຼິ້ນ ຫຼືຍິງເຊົ່າເພື່ອເຂົາຊົມ
ສັງຄົມເອີຍສັງຄົມ ຢ່າປະນາມຫຍາມຮ້າຍ
ຈົ່ງໂຜດຜາຍຄົນເສົ້າ ກໍາ ລັງໃຈເອົາໃຫ້ແນ່
ຢ່າເຫັນແຕ່ວ່າຊົ່ວຮ້າຍ ຍ້ອນຊາຍໄດ້ຮ່ວມເສບເຊີຍ
ສັງຄົມເອີຍຈົ່ງໃຫ້ ຄວາມອຸ່ນແນ່ຈັກນິດ
ຢ່າຄິດພຽງປະນາມຫຍາມ ວ່າຜູ້ຍິງເສຍຕົວສິ້ນ
ຮູ້ບໍ່ໃຜຄົນປົດສີ້ນ ຊົມຕົວນາງໃຫ້ສິ້ນຄ່າ
ຄັນບໍ່ແມ່ນຊາຍໜ້າດ້ານ ເປັນຄົນສ້າງກໍ່ເຂັນ
ໄດ້ຊົມແລ້ວກໍ່ເວັ້ນ ປະຫ່າງວາງໜີ
ຄິດວ່າໃຜຄົນອັບປີ ຊົ່ວຊາມເລວຊ້າ
ເປັນຫຍັງມາປະນາມຂ້າ ຈາຄໍາ ດຽວວ່າຍິງຊົ່ວ
ຕົວຜູ້ຊາຍທີ່ກໍ່ເລື້ອງ ໃຫ້ເມືອງເສົ້າບໍ່ກ່າວຫຍັງ
ແລ້ວກໍ່ຍັງຢູທ່າງຍິ້ມ ເວົ້າມ່ວນຊວນຫົວ
ວ່າຕົວເອງເປັນຄົນງາມ ສໍ່າ ຜູ້ຍິງນອນຊົມລ້າ
ພຽງແຕ່ຫາວິທີເວົ້າ ເອົາໃຈໃຫ້ເຂົ້າຮ່ອມ
ແລ້ວຜູ້ຍິງກໍ່ພ້ອມ ຍອມໃຫ້ເຂົ້າຮ່ວມນອນ
ບໍ່ມີຫຍັງຈະເດືອດຮ້ອນ ສິ້ນເລື່ອງຕາມມາ
ຜູ້ຍິງຫວະຈະຫານຈາ ວ່າຖືກຊາຍນອນຊົມຊ້ອນ
ມິດງຽບນອນປານຫອຍໄຂ້ ຝັນຫຼັບໄຫຼຢູ່ໃນບ່ອນ
ຕ້ອງການນອນກໍ່ແວ່ໄດ້ ພໍໃຈແລ້ວກໍ່ລຸກໜີ
ຖ້າສັງຄົມມີຕາແທ້ ປະນາມແດ່ຊາຍອັບປີ
ຕົວະຜູ້ຍິງດີໆ ຫຼອກກິນປະນາມພ້ອມ
ຮັກຈອມປອມທີ່ເຂົາສ້າງ ສັງຄົມປະນາມແນ່
ເປັນຫຍັງແລລໍ່າ ເວົ້າ ປະນາມຂ້າແຕ່ຜູ້ຍິງ
ນີ້ລະຄືສິ່ງໂຫດຮ້າຍ ແອບແຝງຢູ່ໃນສັງຄົມ
ສາວໃດຊາຍຊົມຕົວ ຄ່າຄົນເກືອບສູນສິ້ນ
ບໍ່ມີໃຜຍິນດີໃຫ້ ອະໄພເຮົາຕັ້ງຕົວໃໝ່
ນອກຈາກເວົາໃສ່ຮ້າຍ ໃຫ້ອາຍໜ້າຂາດຄ່າຄຸນ
ພຽງຖືກຊາຍມາປຸ້ນ ສະຫວາດຮັກເຮົາໄປ
ແລ້ວກໍ່ໄຂວາຈາ ດ່າປະຈານໝົດສິ້ນ
ພໍສັງຄົມໄດ້ຍິນແລ້ວ ປະນາມເຮົາເປັນຄົນຊົ່ວ
ບໍ່ມີໃຜຄິດຄົ້ນຄວ້າ ຄວາມຈິງນັ້ນແມ່ນຫຍັງ
ພຽງແຕ່ຂ້ອຍພາດຟັ້ງ ກໍ່ສິ້ນຄ່າຄວາມດີ
ກຽດສັກສີຂອງຄົນ ແມ່ນບໍ່ມີເຫຼືອໄວ້
ທັງທີ່ໃນວັນຫຼັງນັ້ນ ຄວາມດີເຮົາເຄີຍສ້າງກໍ່
ພໍເມື່ອຊາຍເສບຊ້ອນ ກໍ່ສູນສິ້ນຄ່າໝາຍ
ເຖິງຖືກຊາຍຊົມຊ້ອນ ບໍ່ໄດ້ຜ່ານງານດອງ
ຂ້ອຍຮ້ອງຂໍສັງຄົມ ຈົ່ງອະໄພເຮົາດ້ວຍ
ຈົ່ງຊ່ວຍເຫຼືອຕົວຂ້ອຍ ຂໍຄວາມເຫັນໃຈແນ່
ເມດຕາຄົນຜູ້ຜ່າຍແພ້ ຍັງຫວັງສ້າງສິ່ງດີ
ທີ່ຂ້ອຍເປັນເຊັ່ນນີ້ ຍ້ອນຂ້ອຍອ່ອນດຽງສາ
ບໍ່ພິຈາລະນາຄິດ ຕໍ່ຊາຍທີ່ມາໃກ້
ຊາຍທີ່ມາໄຂເວົ້າ ຫວານຄາລົມລໍ້ລ່າຍ
ຍ້ອນບໍ່ຄິດເຖິງເລື່ອງຮ້າຍ ທີ່ມີຂຶ້ນເມື່ອຫຼັງ
ວັນນີ້ ຈິ່ງຖືກສັງຄົມຕັ້ງ ເປັນນາງຊື່ກາລີ
ຍ້ອນວ່າມີຜົວເຊີຍ ບໍ່ຜ່ານດອງຄອງເຄົ້າ
ຕົກເປັນຂອງນິນທາເວົ້າ ໃນສັງຄົມວ່າຍິງຊົ່ວ
ບາດຜູ້ຊາຍນັກລົ້ວ ສັງຄົມນັ້ນບໍ່ກ່າວຫຍັງ
ບັນຫາທີ່ກໍ່ຕັ້ງ ສ້າງຮ່ວມນໍາ ກັນ
ຍາມມີຄວາມສຸກສັນ ຮ່ວມກັນສະໜຸກຍິ້ມ
ບາດວ່າຊາຍໄລຖິ້ມ ມີພຽງຍິງເປັນຄົນຊົ່ວ
ສັງຄົມເວົ້າວ່າອີ່ລົ້ວ ຜົວເຈົ້ານັ້ນຢູ່ໃສ
ຂ້ອຍໄດ້ພຽງຮໍ່າ ໄຫ້ ນໍ້າ ຕາຫຼັ່ງໄຫຼນອງ
ສັງຄົມມອງຕົວເຮົາ ວ່າເປັນຍິງຮ້າຍ
ຍິງຖືກຊາຍຊົມຫຼິ້ນ ນິນທາກັນດັງສະໜັ່ນ
ຍິງ-ຊາຍ ມີສິດສະເໝີພາບນັ້ນ ມັນມີແທ້ຢູ່ໃສ
ເປັນຫຍັງ ສັງຄົມນັ້ນຈິ່ງໄດ້ ປະນາມແຕ່ຕົວຍິງ
ຄວາມຈິງຕົວຂອງຊາຍ ຍິ່ງຊົ່ວຊາມເລວຊ້າ
ເຊີຍຊົມຍິງແລ້ວປະຖິ້ມ ແຮງໃຈຊາມຊາດຊົ່ວ
ຊອກຫຼອກຕົວະລ່າຍລໍ້ ສັງຄົມນັ້ນພັດເບິ່ງກາຍ
ສຸດທ້າຍໂຊກອັນໂຫດຮ້າຍ ມາຫຸ້ມຫໍ່ໂຮມຍິງ
ຂ້ອຍຈິ່ງເປັນຍິງໝອງ ເພື່ອໃຫ້ຄົນເຂົາເຍີ້ຍ
ຫົວອົກເລີຍມີພຽງເສົ້າ ກັບຄວາມເຫງົາມາສາບແຊ່ງ
ຂ້ອຍຢາກພົບຄວາມຮຸ່ງແຈ້ງ ເພື່ອເດີນກ້າວຕໍ່ໄປ
ເຖິງວ່າຂ້ອຍຊິໄຫ້ ລິນຫຼັ່ງນໍ້າ ຕາໄຫຼ
ຢ່າໄດ້ຫາວ່າຕົວເຮົາ ອ່ອນແອໃຈນ້ອຍ
ພຽງແຕ່ກໍາ ລັງໃຈຂ້ອຍ ກັບຄວາມຫວັງເຄີຍມີກ່ອນ
ມັນຖືກຖອນອອກສິ້ນ ເລີຍເຫຼືອຍິ້ມແຫ່ງນໍ້າ ຕາ
ຂ້ອຍຍັງຈໍາ ຄໍາ ວ່າເວົ້າ ມື້ເຂົາກ່າວອໍາ ລາ
ເປັນວາຈາຄໍາ ຫຍາມ ຕື່ມເຕີມດ້ວຍຄວາມເຍີ້ຍ
ເຂົານັ້ນເຊີຍຊົມຂ້ອຍ ທັງຕົວໃນຫຼາຍທ່າ
ແຕ່ຄຸນຄ່າທີ່ຂ້ອຍໄດ້ ຄືນອນໃຫ້ຫຼັ່ງນໍ້າ ຕາ
ຂ້ອຍຍັງຈໍາ ຈື່ໜ້າ ວາຈາສັ່ງສຸດເຈັບໃຈ
ຂ້ອຍຈື່ໃນຫົວອົກ ຢ່າງບໍ່ມີລືມໄດ້
ເພາະວ່າໃນວັນນີ້ ບໍ່ມີຫຍັງເຈັບປວດກວ່າ
ຄໍາ ວາຈາເຂົາເຍາະເຍີ້ຍ ກັບຮອຍຍິ້ມທີ່ເຍາະຫຍາມ
ຂ້ອຍນີ້ຢາກກ່າວຫ້າມ ບອກຍິງທົ່ວໂລກາ
ໃຫ້ຮູ້ໃນມານຍາລວງ ແຫ່ງຜູ້ຊາຍຄົນນີ້
ຊາຍທີ່ມີເງິນພ້ອມ ວາຈາຫວານຍິ້ມງ່າຍ
ມີອຸບາຍຫຼ່ຽມເວົ້າ ເອົາໃຈໄດ້ທຸກໆຍິງ
ຍາມເມື່ອຫຼິງລໍ່າ ເນື້ອ ຮູບຫຼໍ່ມົນສະເໜ
ຫຼົງໄຫຼເດຄວາມເປັນຊາຍ ທຸກໆຍິງລໍາ ພັນໂອ້
ສະອອນໂສມໂສພາເນື້ອ ມີມົນຂັງຍາມຍິ້ມຜ່ານ
ຄືຜູ້ຊາຍໜ້າດ້ານ ຕົວະຕົ້ມຫຼອກຜູ້ຍິງ
ແຕ່ວ່າສິ່ງຂ້ອຍຢາກເວົ້າ ຍິງໃດແດ່ຈະສົນໃຈ
ຍິງໃດເດຈະຍິນຍອມ ເພື່ອຮັບຟັງເຮົາເວົ້າ
ນອກຈາກເຂົາຈະຫົວເຍີ້ຍ ຫຍາມເຮົາໂງ່ແທ້ນໍ່
ຖ້າບໍ່ໄດ້ພົບພໍ້ ກັບຕົວແລ້ວບໍ່ເຊື່ອໃຜ
ເໝືອນດັ່ງຕົວເຮົາໄດ້ ປະສົບພົບກັບຕົວເອງ
ບໍ່ເຄີຍກົວເກງຫຍັງ ກະສ່າງໃຜຈະຫາເວົ້າ
ເຮົາບໍ່ເຄີຍເຫັນຮູ້ ຄວາມຫວັງດີທີ່ບອກເອີ່ຍ
ຄິດແຕ່ວ່າເຂົາເຍາະເຍີ້ຍ ອິດສາໃຫ້ໃສ່ເຮົາ
ວັນນີ້ຈິ່ງນັ່ງເສົ້າ ເຫງົາຫງ່ວມດວງກະມົນ
ໝອງໝົ່ນໃນຫົວໃຈ ຫຼັ່ງໄຫຼນໍ້າ ຕາຍ້ອຍ
ເປັນປັດຈຸບັນຂ້ອຍ ບໍ່ເໝືອນວັນອະດີດເກົ່າ
ສ່າງເທາະເຮົາຄົນຜ່າຍແພ້ ສົມຄວນແລ້ວຫຼັ່ງນໍ້າ ຕາ
ເຖິງວ່າເຮົາໃນວັນນີ້ ຈະຕົກທີ່ຈົນອັບ
ເຮົາຍັງ ພ້ອມສະເໝີທີ່ຈະຊັບ ເຊັດນໍ້າຕາທີ່ໄຫຼຍ້ອຍ
ຄອຍອອຍໃຈຍາມຕົນເສົ້າ ເອົາໃຈຕົນໃຫ້ຍິ້ມງ່າຍ
ຍິ້ມເພື່ອລາຄວາມຜ່າຍແພ້ ໃນຄັ້ງເກົ່າຫຼັງ
ເຮົານັ້ນຍັງຈໍາ ຊຶ້ງ ສິ່ງໜຶ່ງໃນດວງໃຈ
ເນື່ອງໃນວັນວາເລັນທາຍ ແຜ່ນຜ້າແພຜືນນັ້ນ
ເຂົາມອບມັນມາໃຫ້ ສຸກຫົວໃຈຢ່າງຊຶ້ງຊໍ່າ
ໃຈເຂົາໃນຄືນຄໍ່າ ນັ້ນ ມີຂ້ອຍທີ່ເດັ່ນດີ
ແຕ່ວ່າໃນຄືນນີ້ ບໍ່ມີຄ່າຄວາມໝາຍ
ຕົວເຂົາ ຄົງແຈກຢາຍຜືນແພ ທີ່ງົດງາມກວ່າຜືນນີ້
ເນື້ອຜ້າດີທັງນຸ້ມ ໂຮຍຫອມເນື້ອຜ້າໃໝ່
ເພື່ອທີ່ຈະມອບສົ່ງໃຫ້ ຍິງໃດນັ້ນບໍ່ສ່າງເຫັນ
ເພື່ອໃຫ້ນາງຕື່ນເຕັ້ນ ແລະສືບຕໍ່ເດີນທາງ
ຍ່າງໄປຕາມຮອຍຕີນ ທີ່ເຮົາເຄີຍເດີນນັ້ນ
ທາງທີ່ສຸກສັນລົ້ນ ແສນສວຍງາມປະເສີດຄ່າ
ສຸດທ້າຍ ຈະມາພົບຄວາມປວດລ້າວ ເປັນກ້າວເພື່ອສັ່ງລາ
ມັນນັ້ນຄືແຜ່ນຜ້າ ອະດີດໜຶ່ງໃນຄວາມຫວັງ
ຂ້ອຍຍັງເກັບຮັກສາມັນ ເພື່ອນຶກເຖິງຮອຍແຄ້ນ
ເປັນຕົວແທນຂອງຄວາມເສົ້າ ເຕືອນໃຈເຮົາຍາມໃຫ້ຮໍ່າ
ເຊັດນໍ້າ ຕາໃຫ້ແຫ້ງນໍ້າ ໃນຍາມໄຫ້ຮໍ່າ ຄະນິງ
ເຖິງມັນເປັນສິ່ງນ້ອຍ ບໍ່ມີຄ່າໃນລາຄາ
ແຕ່ວ່າມັນມີຄວາມໝາຍ ຍິ່ງໃຫຍ່ໃນຫົວໃຈຂ້ອຍ
ເຖິງເປັນແພຜືນນ້ອຍ ສາຍຕາເຂົາບໍ່ມີຄ່າ
ໃນສາຍຕາຂ້ອຍແລ້ວ ມັນນັ້ນຍິ່ງໃຫຍ່ຫຼາຍ
ເພາະມັນນໍາ ໂຊກໂຫດຮ້າຍ ຄັ້ງຍິ່ງໃຫຍ່ໃນຊີວາ
ໂຊກມານຍາຄາລົມລວງ ຫຼ່ຽມຊາຍຊົມຍ້ອງ
ຮຽນຮູ້ຄວາມໝອງເສົ້າ ຜິດຫວັງເຫງົາຢ່າງໄຮ້ຄ່າ
ຮູ້ໃນຄວາມຊ່າຊຶ້ງ ກັບຄວາມເສົ້າແສບທວງ
ຮູ້ໃນໂລກໜ່ວຍກວ້າງ ເມື່ອມີຮັກມີສຸກສັນ
ເມື່ອຮັກກັນຢ່າງຈິງໃຈ ກໍ່ສ່າງມີຄວາມສຸກລົ້ນ
ຮັກນັ້ນເປັນຜົນໃຫ້ ປັດໄຈດີຫຼາຍໆສິ່ງ
ແຕ່ຄວາມຈິງສິ່ງຂ້ອຍພໍ້ ຄືຕົວຂ້ອຍຮັກຫຼຸ່ມຫຼົງ
ຂໍເວລາຈົ່ງຊ່ອຍຂ້ອຍ ເພື່ອທີ່ຈະປັບໃຈ
ເປັນຢາປົວໃນຮອຍແຜ ທີ່ແຜ່ລາມໃນໃຈຂ້ອຍ
ລຶບແຜຊາຍມານຍາຮ້ອຍ ຄອຍທໍາ ລາຍຍາມໂດດດ່ຽວ
ເມດຕາຫຼຽວລໍ່າ ຂ້ອຍ ຍາມໃຈຊໍ້າ ແສບລະທົມ
ຮັກຄັ້ງນີ້ເຖິງຊິລົ້ມ ຂໍລຸກຕໍ່ເດີນຕາມ
ນໍ້າ ທະເລຈະສວຍງາມ ກໍ່ເພາະມີຟອງຄື້ນ
ຄືນລາຕີຈະງາມລໍ້າ ມີດວງດາວສາດສ່ອງ
ຊີວິດຂອງຂ້ອຍນັ້ນ ຕ້ອງເປັນຂ້ອຍສົ່ງພະລັງ
ເວລາເອີຍຈົ່ງຊ່ອຍຢັ້ງ ພາບແຫ່ງຄວາມຫຼັງ
ຫວັງວ່າຈິດໃຈເຮົາ ຊິເຂັ້ມແຂງກວ່າວັນນີ້
ຫວັງຈະມີຮອຍຍິ້ມ ຄວາມສຸກໃຈທີ່ລຽບງ່າຍ
ເມື່ອນັ້ນພາບອັນໂຫດຮ້າຍ ຄົງໝົດສິ້ນອອກຈາກໃຈ
ວັນນີ້ຂໍຂາບໄຫວ້ ກັບພາບແຫ່ງຄວາມຫຼັງ
ໃຫ້ພົບຍັງຄວາມຜາສຸກ ທີ່ທ່ຽງຈິງເສຍຖ້ອນ
ລາກ່ອນຄວາມຫຼັງຂ້ອຍ ທີ່ເຄີຍຫວານແສນຊ້ອຍຊື່ນ
ກັບວັນຄືນຂົມຂື່ນເສົ້າ ໃນມື້ຕໍ່ໆກັນ
ແຟນເອີຍແຟນຂ້ອຍນັ້ນ ຂ້ອຍຂໍກ່າວອໍາ ລາ
ນີ້ເປັນຄັ້ງສຸດທ້າຍນະ ທີ່ກ່າວລາໃຫ້ກັບເຈົ້າ
ບັດນີ້ເຮົາຈະໄປເຂົ້າ ຫາຄວາມຈິງຊີວິດໃໝ່
ໄປລ້າງໃຈໃຫ້ປອດກ້ຽງ ໝົດສ້ຽງສິ່ງທຸກໃຈ
ລາກ່ອນ ຄວາມຮູ້ສຶກທີ່ໄດ້ ເຈັບເລິກໆໃນຫົວໃຈ
ລາກ່ອນ ອະດີດເຄີຍຫຼົງໄຫຼ ຢ່າງໂງ່ງົມຈົມຕົມຊໍ້າ
ລາກ່ອນ ຄວາມຜິດຫວັງທີ່ທໍາ ໃຫ້ ຈິດໃຈເຮົາໄດ້ສະຫວ່າງ
ລາກ່ອນ ຄວາມສຸກທີ່ອ້ອມໂອບຂ້າງ ເຕັມໄປດ້ວຍສິ່ງຫຼອກລວງ.
ຂຽນເມື່ອປີ 1999
