ກ່ອນຈະສິ້ນແສງທຽນ

ທີ່ຮັກ        ທຽນເຫຼັ້ມນີ້ຊິໄດ້             ດັບມອດໝົດແສງ ເສຍແລ້ວ

      ແຕ່ວ່າມັນຍັງແດງ                 ສົ່ງແສງໃຫ້ຕົວນ້ອງ         

ຂຽນຈົດໝາຍ  ດ້ວຍຫົວໃຈໝອງເສົ້າ        ໄປຫາຍິງຄົນໜຶ່ງ           

      ເຊິ່ງໃນຄາວກ່ອນພຸ້ນ               ເຄີຍໄດ້ຮັກກັນ       

            ເມື່ອໃດຕົວອ້າຍນັ້ນ          ໄດ້ຮັບຈົດໝາຍ      

      ໂປຼດຢ່າທຳລາຍມັນ                ນີ້ເປັນຄຳຂໍຮ້ອງ      

      ເຖິງອັກສອນຈະໝອງເສົ້າ           ຕົວບໍ່ງາມວາດບໍ່ຄ່ອງ        

      ອ້າຍຢ່າຟ້າວຍ່ອງຖິ້ມ               ເໝືອນຄົນຊ້ຳທີ່ສົ່ງມັນ       

            ນ້ອງຫວັງວ່າອ້າຍນັ້ນ         ຈະອ່ານຢ່າງເຕັມໃຈ        

      ອ່ານເນື້ອໃນຈົດໝາຍ              ຫຼັ່ງນ້ຳຕາລາອ້າຍ          

      ຂຽນຫາຊາຍດ້ວຍຄວາມເສົ້າ         ດວງອຸລາໝອງໝົ່ນ         

      ສອງດວງຕາເລີ່ມລົ້ນ               ລິນຍ້ອຍຢາດນ້ຳຕາ         

            ວັນເວລາຜ່ານພົ້ນ           ລັບລ່ວງເລີຍມາ      

      ດວງອຸລາເຄີຍມີສຸກ                ຊື່ນໃຈກັບອ້າຍ      

      ມີຄວາມໝາຍກັບໃຈນ້ອງ            ສຳຄັນຢ່າງຍອດຍິ່ງ         

      ດ້ວຍໃຈຈິງນ້ອງຮັກອ້າຍ            ຈິ່ງໝາຍໃຫ້ທຸກສິ່ງຫວັງ      

            ພາບອະດີດແຕ່ລະຄັ້ງ        ນ້ອງຍັງຈື່ຝັງໃຈ      

      ຄວາມສົດໃສຂອງຊີວິດ             ເມື່ອຢູ່ຮຽງຄຽງອ້າຍ         

      ມັນໄດ້ສາຍເປັນເລື້ອງ              ບົດລະຄອນທີ່ຫວານຊື່ນ      

      ເຕັມໄປດ້ວຍຄວາມຟົດຟື້ນ          ສະໜຸກແມ້ງເບີກບານ       

            ຊີວິດເໝືອນຢູ່ບ້ານ     ວິມານແຫ່ງເມືອງສະຫວັນ          

      ທຸກເຊົ້າສວາຍຄືນວັນ               ນ້ອງມີຄວາມສຸກລົ້ນ         

      ເໝືອນເມືອງຄົນທັງຄ້າຍ            ເຮົາສອງຄົນເປັນເຈົ້າຢູ່       

      ເໝືອນດັ່ງດາວຄູ່ຟ້າ                ປານັ້ນຄູ່ນະທີ       

            ໂອນໍໂລກໜ່ວຍນີ້           ມັນສ່າງສົດໃສ       

      ຄວາມສຸກໃນດວງໃຈ               ສ່າງຊື່ນຊຳຈິງແທ້          

      ຕັ້ງແຕ່ວັນທີ່ຕົວອ້າຍ               ວາຈາຄຳອອກມາວ່າ        

      ອ້າຍປາດຖະໜາຕໍ່ນ້ອງ             ໝາຍປອງເຂົ້າຄູ່ຂວັນ       

            ອ້າຍຮູ້ບໍ່ມື້ນັ້ນ              ນ້ອງຊ້ອຍຊື່ນພຽງໃດ        

      ນ້ອງສຸດແສນດີໃຈ                 ບໍ່ອາດພັນລະນາໄດ້         

      ໝາກຫົວໃຈມັນເຕັ້ນ               ລຳເພັນຢ່າງດູດດື່ມ         

      ນ້ອງຊຶງຊຶມເພາະຕື່ນເຕັ້ນ            ກັບຄຳອ້າຍບອກຮັກມາ      

            ອ້າຍວາຈາຕໍ່ນ້ອງ           ດ້ວຍຮັກໜຶ່ງບໍ່ມີສອງ        

      ຈະປະຄອງຄວາມຮັກ               ໃຫ້ຊື່ຊະບໍ່ມີເສົ້າ      

      ຮັກສອງເຮົາມີພຽງຍິ້ມ              ບໍ່ມີເຫງົາບໍ່ຂົມຂື່ນ          

      ທຸກວັນຄືນຈະຮັກນ້ອງ         ດ້ວຍໃຈໝັ້ນປາດຖະໜາ           

            ຄຳສັນຍາອ້າຍນັ້ນ           ນ້ອງເຊື່ອໝົດໃຈ           

      ນ້ອງເຊື່ອໃນວາຈາ                 ບອກຮັກມາຂອງອ້າຍ        

      ນ້ອງຈຶ່ງໝາຍຄຳໝັ້ນ               ສັນຍາໃຈໄວ້ວ່າ      

      ດວງອຸລາແຫ່ງນ້ອງ                ຈະມີອ້າຍຢູ່ທີ່ໃຈ           

            ນ້ອງຈະຮັກອ້າຍໄວ້          ເປັນທີ່ບູຊາ         

      ເປັນມາລາໃນຫົວໃຈ               ໃຫ້ງົດງາມຫອມຊຶ້ງ         

      ນ້ອງຈຶ່ງໝາຍໃຈສ້າງ           ນະຄອນຫວານຮັກຊ້ອຍຊື່ນ         

      ທຸກວັນຄືນຮັກແຕ່ອ້າຍ              ຊາຍໃດນັ້ນບໍ່ອາດແທນ      

            ຄວາມຮັກຄ່ອຍຮັດແໜ້ນ      ກາງແທ່ນດວງໃຈ          

      ໃນອຸລາມັນແສນ                  ຊື່ນໃຈຈິງແທ້       

      ແນ້ວແນ່ໃຈເມື່ອຍາມອ້າຍ           ໝາຍປະຄອງໃກ້ມໍ່          

      ໃຈຕື້ນຕັນຢູ່ບໍ່ແລ້ວ                 ຄວາມສູກນັ້ນອະເນກນອງ          

            ຫົວໃຈນ້ອງມັນຮຽກຮ້ອງ      ຕ່າງໆນາໆ         

      ເພື່ອສະແດງກິລິຍາ                ທີ່ຊື່ນຊົມໃຫ້ກັບອ້າຍ        

      ສະແດງໃຈທີ່ໝາຍສ້າງ             ສະຫວັນທອງທຽມພີ່        

      ຫົວອົກນ້ອງທັງສີ່ຫ້ອງ           ໝາຍປອງອ້າຍບໍ່ປ່ຽນໃຈ           

            ນ້ອງນີ້ຄິດໄຄ່ໄວ້         ກັບພາບແຫ່ງຄວາມສຸກສັນ          

      ໃຈຄິດເຖິງວັນວິວາ                ທີ່ອີ່ມເຕັມດ້ວຍຮອຍຍິ້ມ      

      ດ້ວຍສອງໃຈຍິນດີສ້າງ              ປາງທອງທຽມທ່ອງ         

      ສອງຄົນເຮົາອ້າຍແລະນ້ອງ           ປະຄອງຂ້າງຄູ່ໝອນ        

            ຫຼາຍວັນຄືນນອນຄິດໄວ້       ແສນຊ້ອຍຊື່ນສົດໃສ        

      ກັບຫົວໃຈທີ່ມີຮັກ                  ມອບໃຫ້ພຽງຕົວອ້າຍ        

      ນ້ອງມຸ່ງໝາຍສົມສ້າງ              ນອນຮຽງປາງກັບອ້າຍພີ່      

      ນ້ອງຢາກມີອ້ອມກອດອ້າຍ           ຍາມເຂົ້າສູ່ບ່ອນນອນ        

            ຍາມເມື່ອຕອນນ້ອງພົບອ້າຍ    ຫຼາຍໆເທື່ອກາຍມາ         

      ຢາກຜວາຫົວໃຈ                  ເຂົ້າກອດເອົາຕົວອ້າຍ       

      ແຕ່ເສຍດາຍບໍ່ທຳໄດ້               ມັນນັກໃຈໂອ້ອ່າວ          

      ປະເພນີຂອງລາວ ເພິ່ນບໍ່ອະນຸຍາດໃຫ້  ຍິງທຳໄດ້ບ່ອນເປີດແປນ     

            ບໍ່ແມ່ນນ້ອງຫຍາມຮີດແຄວ້ນ   ປະເພນີເກົ່າຄອງຫຼັງ        

      ນ້ອງກໍ່ຫວັງໃຫ້ຍິງລາວ             ຮັກຮີດຄອງດີງາມນັ້ນ        

      ຮັກເຜົ່າພັນພົງເຊື້ອ                ສາມັກຄີຕັ້ງຕໍ່        

      ຮັກແລ້ວຕ້ອງສູ່ຂໍ ເອົາພໍ່ແມ່ພີ່ນ້ອງ     ມາໝາຍໝັ້ນຕໍ່ກັນ          

            ນ້ອງເຊື່ອວ່າອ້າຍນັ້ນ         ກໍ່ຮູ້ຢູ່ເຕັມໃຈ        

      ຮູ້ຢູ່ໃນປະເພນີ                   ແຕ່ອ້າຍຍັງທຳໄດ້          

      ອ້າຍທຳລາຍຫົວໃຈນ້ອງ           ກັບຄວາມງາມສູນສິ້ນຄ່າ     

      ອ້າຍທຳຕາມອາລົມ ໂດຍບໍ່ຄິດວ່ານ້ອງ  ຈະໝອງເສົ້າເຊັ່ນໃດ        

            ນ້ອງກ່າວວອນໄຫວ້ອ້າຍ      ຫຼາຍເທື່ອຊາຍຍັງຂືນ        

      ນ້ອງສຸດຝືນລະອາຍໃຈ             ຕໍ່ສິ່ງຊາຍເຄີຍທຳໄວ້        

      ເຖິງບໍ່ພໍໃຈໃຫ້                ຢ້ານຕົວຊາຍເສຍໃຈກວ່າ           

      ປະຕິເສດຈຶ່ງບໍ່ກ້າ                 ວາຈາເວົ້າອອກໄປ          

            ເພາະໃຈນ້ອງເຊື່ອອ້າຍ       ເປັນທີໜຶ່ງໃນຫົວໃຈ        

      ຊຶ້ງຢູ່ໃນຄວາມຮັກ                 ທີ່ອ້າຍເຄີຍມີໃຫ້     

      ສະເໜຫາຍາມໃກ້                 ຫຼົງໄຫຼໃຈບໍ່ຮູ້ເບື່ອ          

      ຄວາມຈິງໃຈເພື່ອໃຫ້ອ້າຍ            ເຫັນໃຈນ້ອງຮັກສໍ່າໃດ       

            ອ້າຍຈື່ບໍໃນຄືນນັ້ນ           ອ້າຍເວົ້າກ່າວຄຳໃດ         

      ອ້າຍກ່າວສາບານໃຈ               ຈະເບິ່ງແຍງປົກປ້ອງ        

      ຄືນນັ້ນຊາຍຈັບມືນ້ອງ              ປະຄອງມາຈູບຄ່ອຍໆ       

      ຮູ້ສຶກວ່າຄວາມອ່ອນຊ້ອຍ            ຕິດຕຶງຊຶ້ງຊໍ່າໃຈ      

            ຕໍ່ນັ້ນຕົວອ້າຍໄດ້            ຄ່ອຍໆຍັບມາ       

      ກອດເອົາຮຽມເຂົ້າໄປຫາ            ແນບຊວງຊິດໃກ້           

      ແລ້ວຄ່ອຍຊົມໃບໜ້າ             ປະສານຕາຢ່າງຫວານຊໍ່າ           

      ອ້າຍກ່າວຄຳທີ່ອ່ອນຊ້ອຍ            ຫວານຊຶ້ງເຂົ້າສູ່ໃຈ         

            ອ້າຍຄ່ອຍກອດນ້ອງໄວ້       ມາແນບໃສ່ທຽມອົກ         

      ນ້ຳຕາຮຽມຈົນຊຶມຕົກ               ເພາະດີໃຈລົ້ນ       

      ອ້າຍເປັນຄົນທຳໃຫ້                ຫົວໃຈຮຽມຮູ້ວ່າ     

      ເວລາໃກ້ຄົນຮັກນັ້ນ                ມັນຫວານຊ້ອຍເຊັ່ນໃດ      

            ຄວາມສຸກໃຈສ່າງລົ້ນ         ສຸດທີ່ພັນລະນາ      

      ຈະຫາຄວາມຫວານໃດ             ບໍ່ເທົ່າທັນທຽມໄດ້          

      ບໍ່ມີສຽງໃດຊຶ້ງ                    ສໍ່າວາຈາຄົນຮັກໄຄ່         

      ຄວາມຮັກອ້າຍມອບໃຫ້ນ້ອງ          ສ່າງຫວານຊຶ້ງຊື່ນມະໂນ     

            ຍິ່ງຄິດຍິ່ງອ່າວໂອ້         ອະດີດແຫ່ງຄວາມຫວານ           

      ກັບວັນວານ ວາເລັນທາຍ           ອ້າຍໄດ້ມາຫານ້ອງ         

      ມີຂອງຂວັນມາໃຫ້                 ຊໍ່ມາໄລດອກຫອມຫ່ວນ      

      ອ້າຍຊວນນ້ອງໄປທ່ຽວຫຼິ້ນ           ສະໜຸກແມ້ງເບີກບານ       

            ຄືນນັ້ນອ້າຍກ່າວຕ້ານ         ທຸກຢ່າງນ້ອງພໍໃຈ          

      ມີແສງໄຟຂອງທຽນ                ຮຸ່ງລະໄມເທິງໂຕະນັ້ນ       

      ຢູ່ຂ້າງມັນຍັງມີອ້າຍ                ນັ່ງຮຽງກາຍຍິງຄົນໜຶ່ງ       

      ຍິງຊຶ່ງໃຈຮັກອ້າຍ                 ໜັກແໜ້ນໜຶ່ງດຽວ         

      ວາເລັນທາຍຄືນນີ້ ນ້ອງສຸດທີ່ປ່ຽວແລ້ງ  ແສງສົ່ງກໍ່ອັບເສົາ           

      ທຽນສົ່ງແສງໃຫ້ຕົວເຮົາ             ນັ່ງຂຽນຈົດໝາຍນ້ອຍ       

      ເປັນຄວາມຈິງຊີວາຂ້ອຍ             ບໍ່ເໝືອນວັນອະດີດຜ່ານ      

ວັນແຫ່ງຄວາມສຸກສຳລານ ກາຍເປັນມານເຂັ່ນຂ້າ ຫົວໃຈນ້ອງໃຫ້ປ່ວຍໂຊ      

            ຍິ່ງຄິດຍິ່ງອ່າວໂອ້           ເຖິງວັນແຫ່ງຄວາມຫຼັງ       

      ວັນທີ່ຍັງມີຮັກ                     ຫ່ວງຄະນິງເຖິງອ້າຍ        

      ຮັກທີ່ຊາຍເຄີຍມີໃຫ້                ອາໄລວອນເປັນຄັ້ງເກົ່າ      

      ເຫຼືອໄວ້ເປັນຄວາມໂສກເສົ້າ         ລະກຳຊ້ຳຄັ່ງຊວງ          

            ຢູ່ໃສອ້າຍຮັກນ້ອງ           ຫວງຫ່ວງສຸດຊີວັນ          

      ຄຳລຳພັນຫວານໆ                 ອ້າຍກ່າວຊົມຕົວນ້ອງ        

      ວ່າໝາຍປອງສົມສ້າງ              ພຽງຍິງດຽວບໍ່ປີ້ນປ່ຽນ       

      ຈະພາກພຽນຕໍ່ນ້ອງ                ບໍ່ມີມື້ຫ່າງຫາຍ      

            ນ້ອງໃນນາມເພື່ອນເກົ່າອ້າຍ ເຄີຍໝາຍຮ່ວມອຸດົມການ           

ນ້ອງນີ້ ສຸດສົງສານຫົວໃຈ                 ທີ່ຄໍ່າຄວນຄາງຮ້ອງ         

      ແຕ່ສິ່ງຫວັງຄອງຖ້າ                ຄືມາຍາຫຼອກອຸ່ນ           

      ຄາບອາສູນຈາກອ້າຍ               ມັນໝາຍຂ້າໃຫ້ແຈບຈົມ      

            ຍິ່ງກ່າວຈົ່ມໃຫ້ອ້າຍ          ຍິ່ງເບື່ອໜ່າຍຄວາມຫຼັງ      

      ຄາລົມຫວານຝັງຫົວໃຈ             ບໍ່ອາດລືມລົງໄດ້     

      ຄວາມເອົາໃຈເຄີຍມີໃຫ້             ຝັງຫົວໃຈຢ່າງຊຶ້ງຊ່າ        

      ດວງມາລາເຄີຍໃຫ້ນ້ອງ             ຍັງຫອມຊຶ້ງຢູ່ທີ່ໃຈ          

            ອ້າຍເຄີຍມອບດອກໄມ້        ແມ້ງເມື່ອວາເລັນທາຍ       

      ມັນຊ່າງມີຄວາມໝາຍ              ສິ່ງໃດບໍ່ທຽມໄດ້      

ແຕ່ແລ້ວ      ອ້າຍມອບມັນມາໃຫ້      ຂອງຂວັນໃຈເພື່ອຫຼອກອຸ່ນ          

      ອ້າຍຈຶ່ງເຫັນຄຸນຄ່ານ້ອງ         ພຽງຍິງໃຫ້ເພື່ອຜ່ອນເຫງົາ          

ລືມແລ້ວບໍ     ຄືນທີ່ອ້າຍກ່າວເວົ້າ          ປາກກ່າວເປັນສັນຍາ        

      ດວງດາລາຍັງຄຽງເດືອນ            ແຜ່ນດິນຄູ່ຄຽງຟ້າ          

      ມັດສາປາບໍ່ໜີນ້ຳ                  ສາວນາງຄຽງອ້າຍພີ່        

      ສັດຈະທັດເຫຼົ່ານີ້                  ບໍ່ມີມື້ຊິປ່ຽນໄປ       

            ນີ້ຫຼືອ້າຍກ່າວໄວ້            ປາກລັ່ນສັນຍາໝາຍ        

      ລຸກຜູ້ຊາຍມີຄວາມຮັກ              ມັກດຽວໃນໃຈອ້າຍ         

      ແຕ່ຕົວຊາຍເຫັນນ້ອງ               ໝາຍປອງພຽງຄວາມໄຄ່     

      ເປັນທາງຜ່ານໃຫ້ອ້າຍ              ຊົມຫຼິ້ນເມື່ອເຫງົາ           

            ນ້ອງຄິດຮອຄຳວ່າເວົ້າ        ທີ່ອ້າຍກ່າວມັນຍັງປັກ       

      ຍອດດວງໃຈ ສຸດທີ່ຮັກ             ພັກດີພຽງນ້ອງ       

      ອ້າຍປະເປັນຄຳໝອງເສົ້າ           ໃນຫົວໃຈນ້ອງນີ້ບໍ່          

      ອ້າຍກໍ່ຮັກໃຫ້ນ້ອງ                 ແລ້ວພັງຖິ້ມບໍ່ອິ່ນດູ         

            ຄົນຫວ່ານພືດຫວັງເພື່ອກູ້      ຜົນລະປູກມາມື      

      ສິ່ງນີ້ຄືສັດຈະທັດ                  ແຫ່ງຄົນຄົງໄດ້      

      ແຕ່ວ່າໃຈຂອງອ້າຍ                ໝາຍປອງອັນໃດນໍ່         

      ຫວ່ານຮັກແລ້ວກໍ່ຖິ້ມ               ບໍ່ເກັບກູ້ດັ່ງພວກເຂົາ        

            ນີ້ຫຼືຄຳອ້າຍເວົ້າ             ບອກຮັກເປັນສັນຍາ         

      ໃຫ້ນ້ອງລໍເວລາ                   ອ້າຍມາສູ່ຂໍນ້ອງ     

      ມາກອດແອວປະຄອງເຂົ້າ            ຕຽງນອນຂ້ອນເສື່ອ         

      ຫຼັງຈາກພົງເຜົ່າເຊື້ອ                ຜູກແຂນໃຫ້ແຕ່ງດອງ       

            ບໍ່ແມ່ນນ້ອງຮຽກຮ້ອງ         ເພື່ອທວງຄ່ານຳຊາຍໃດ      

      ນ້ອງເວົ້າຕາມພາສາໃຈ             ເມື່ອຄະນິງເຖິງອ້າຍ         

      ຂຽນລະບາຍຄວາມເສົ້າ             ເຫງົາໃຈຄິດຮອດພີ່         

      ອາໃສທຽນເຫຼັ້ມນີ້                  ພໍໄດ້ຮຸ່ງເຫັນ        

            ຂຽນພໍເປັນສິ່ງລຶ້ມ           ຮັກຈາກພີ່ຢ້ານລືມໄລ       

      ຢ້ານຫົວໃຈມັນຫຼົງ                 ເຫດການທີ່ຫວານຊຶ້ງ        

      ຄວາມຕຶງໃຈອາໄລເສົ້າ             ເຫງົາທຳໃຈໃນວັນຜ່ານ      

      ອະທິຖານເພາະຢ້ານອ້າຍ            ຊິລືມນ້ອງຊົ່ວຊີວາ          

            ຢ້ານອ້າຍລືມໜ້ານ້ອງ        ເມື່ອຍິງໃໝ່ມາແທນ         

      ຍາມມີແຟນຄົນງາມ                ຢ້ານເລົ່າໄລລືມນ້ອງ        

      ລືມຍິງໝອງອຸລາເສົ້າ               ຍາມເຫງົາໃຈເວວັ່ງ         

      ນອນນ້ຳຕາຫຼັ່ງເບົ້າ                ສະຫຼອງເສົ້າໂຊກຊະຕາ      

ດຽວນີ້        ນ້ຳຕານ້ອງລິນອາບໜ້າ       ປຽກຊຸ່ມລົງຕົວ       

      ຫົດຫົວໃຈທີ່ຫຼົງຮັກ                ລູກຜູ້ຊາຍມານຍາຮ້ອຍ      

      ອ້າຍຮູ້ບໍນ້ຳຕາຂ້ອຍ                ມັນໄຫຼລົງລ້າງຄວາມໂງ່      

      ລ້າງຕົນໂຕທີ່ແປດເປື້ອນ            ຈາກມືອ້າຍລູບຄຳ          

            ຫຼັ່ງລົງປົວແຜບອບຊ້ຳ        ທີ່ເກີດຢູ່ກາງໃຈ      

      ນ້ອງປ່ອຍມັນລິນໄຫຼ               ເພື່ອລ້າງສອງພວງແກ້ມ      

      ລ້າງສອງແຄມຄາງຂ້ອຍ            ຮອຍມືຊາຍເຄີຍລູບຜ່ານ     

      ລ້າງຄາບຫວານຈາກປາກອ້າຍ        ເຄີຍຫອມຫຼິ້ນເມື່ອກ່ອນຫຼັງ          

            ລ້າງອະດີດທຸກຄັ້ງ           ທີ່ເຄີຍຮ່ວມຜາສຸກ          

      ໄຫຼເພື່ອປົດຄວາມທຸກ              ຫ່ວງໄຍອາໄລອ້າຍ         

      ຢາດເພື່ອຫາຍຄວາມເສົ້າ     ຄາຍຄວາມເຫງົາຍາມໂດດດ່ຽວ      

      ຢາດແກ່ອ້າຍຊາຍກ່ຽວຂ້ອງ          ໃຫ້ເປັນນ້ຳເພື່ອແຜ່ບຸນ       

            ຍ້ອນຫົວໃຈຖືກອ້ານປຸ້ນ       ຈຶ່ງໝາຍຫຼັ່ງນ້ຳຕາຫາ       

      ນ້ຳຕາສຸດລາຄາແພງ           ຫຼັ່ງລ້າງຄວາມຜິດຫວັງຖິ້ມ          

ຫົວໃຈນ້ອງ    ຖືກອ້າຍຊີມຄວາມຫວານຊຶ້ງ    ມັນເລີຍໂຫຍແຫ້ງຫ່ຽວ       

      ຫົວໃຈນ້ອງມັນປ່ຽວເສົ້າ             ເມື່ອໃຈອ້າຍປ່ຽນໄປ         

ນັບແຕ່       ນ້ອງໄດ້ຮັບຂ່າວອ້າຍ         ມີແຟນໃໝ່ໃຈສັບສົນ        

      ມັນມືດມົນເໝືອນເມືອງຄົນ           ສິ້ນແສງຕາເວັນແລ້ວ        

      ນ້ຳຕາແນວຄວາມເສົ້າ              ຢາບັນເທົາຄວາມຄັ່ງ        

ມັນຢາດຫຼັ່ງ    ເປັນຖ້ອຍຄຳສອນສັ່ງນ້ອງ     ທີ່ເຫັນໃກ້ງ່າຍໃຈ           

            ທຽນເຫຼັ້ມນີ້ຄ່ອຍໄໝ້         ຈວນມໍ່ຈະໝົດແສງ         

      ມັນບໍ່ມີລາຄາແພງ                 ແຕ່ຈູດຕົວເຜົາໃໝ້          

      ຫວັງເພື່ອຄົນຊິດໃກ້           ໄດ້ແນມເຫັນແສງສະຫວ່າງ         

      ເຫັນເສັ້ນທາງທີ່ຖືກຕ້ອງ        ຢ່າໝອງເສົ້າເພາະສິ່ງລວງ          

            ດ້ວຍຄວາມຮັກຫ່ວງອ້າຍ      ສະເໝີແກ່ນດວງຕາ         

      ນ້ອງຂໍອະທິຖານ                  ໃຫ້ຊຍສຸກໃຈລົ້ນ           

      ນ້ອງຍິນດີເປັນຄົນໃຫ້             ເຜົາຫົວໃຈເພື່ອອ້າຍຜ່ານ           

      ເປັນສາຍທານເມື່ອອ້າຍຮ້ອນ         ລົງຫຼິ້ນອາບສວ່າງເຢັນ       

            ເມື່ອເຫັນນ້ອງອ້າຍຢ່າເວັ້ນ     ທັກທາຍແດ່ຈອມໃຈ        

      ຫາກວັນໃດຊາຍຜິດຫວັງ            ຈາກຜູ້ຍິງຄົນນັ້ນ           

      ນ້ອງຂໍຂັນອາສາໃຫ້                ກຳລັງໃຈອອຍພີ່           

      ຊີວິດນ້ອງຊາດນີ້                  ກຸສົນສ້າງເພື່ອຊາຍ         

ສຸດທ້າຍ     ນ້ອງຕ້ອງຂໍໂທດອ້າຍ         ຈົດໝາຍສົ່ງມົວໝອງ        

      ເພາະນ້ຳຕານ້ອງໄຫຼນອງ         ຢາດຖືກຊອງມັນເລີຍເປື້ອນ         

      ຫາກຜິດໃຈໂປຼດເຕືອນນ້ອງ          ປັນຍາເບົາຮຽນຮູ້ຕໍ່າ         

      ຖ້າຖ້ອຍຄຳບໍ່ອ່ອນຊ້ອຍ             ອະໄພຂ້ອຍຜູ້ໂງ່ເຂົາ        

            ຂໍອ່ວຍພອນໃຫ້ເຈົ້າ          ອ້າຍພີ່ມີຄວາມສຸກ          

      ສິ່ງຜູກພັນຄາວຫຼັງ                 ແຫ່ງພວກເຮົາໃຫ້ຈຳໄວ້      

      ຖ້າຍັງມີນ້ຳໃຈໃຫ້                 ກຳລັງໃຈສົ່ງນ້ອງແດ່       
      ນ້ອງຂໍແຜ່ຮັກເລັກໜ້ອຍ             ປົວແຜຊ້ຳທີ່ອ້າຍທຳ ແດ່ຖ້ອນ.